- Музејот на Македонија со години има одлична соработка со УГД и можноста што ја имавме досега ја реализиравме, а сега и официјално ја продолжуваме. Музејот на Македонија официјално се вклучува во образовниот процес на Универзитетот и со тоа имаме една поширока и поголема можност за соработка на домашни, но и на меѓународни проекти кои ќе ги реализираме во партнерство – изјави Гордан Николов, в.д. директор на Музеј на Македонија.

Ректорот на УГД, проф. д-р Блажо Боев, изрази благодарност до директорот на Музеј на Македонија што издвои време да дојде на УГД и да се потпише Договорот за соработка.

- Со Договорот ја продолжуваме и унапредуваме досегашната соработка во рамките на она што значи културно наследство на Република Македонија и она што е сегашно творештво во делот на авторите кои творат во културата. Во насока на отворање на Универзитетот кон општествената заедница ова е чин на отворање кон Музејот на Македонија и, се разбира, нашите студиски програми во делот на историјата и археологијата, од една страна, и ликовната уметност, од друга страна, ќе дадат голем придонес во поддршката на оваа соработка со Музеј на Македонија. Мислам дека и студентите и сите оние кои творат во културата ќе имаат голем придонес од оваа соработка – изјави ректорот Боев.