Во рамките на Фестивалот „Есенски музички свечености“ во Музеј на Град Скопје се одржа концерт по повод 135 години од раѓањето на унгарскиот композитор Бела Барток (1881 – 1945). На концертот настапија и професори од Музичката академија при Универзитетот „Гоце Делчев“: Златка Митева – флејта, Бранко Павловски – кларинет и Наташа Трбојевиќ – пијано, кои се претставија со варијации на тема „Braul“ по Барток од американскиот композитор Sean Michael Solomon (1945).
На концертот во публиката беа присутни и претставници од дипломатскиот кор во Република Македонија, а во знак на благодарност од страна на амбасадорот на Унгарија во Република Македонија на учесниците им беа доделени признанија, како и нотен и аудио материјал од творечкиот опус на композиторот Бела Барток за Музичката академија во Штип.
