Првата дестинација што ја имаше честа да го организира овој саем беше Скопје. Младинскиот културен центар се наполни со дела на стотина македонски уметници, дизајнери, архитекти, артизани и со многубројна публика која ги посетуваше сите содржини во текот на три дена.

Дел од програмата вклучи и претставување на уметничките училишта, факултети и академии. Студентите од Ликовната академија при УГД се претставија со избор на слики и цртежи - дел од програмата по класично сликарство. Нивното успешно претставување го побуди интересот на публиката, но и на организаторите, така што нашата академија беше поканета да се претстави и во наредните години.

„Паратисима Скопје“ се одржува во првата половина на јуни во Младинскиот културен центар. Задоволни од искуството, посетеноста и соработката со „Паратисима Скопје“, студентите од Ликовната академија веќе се подготвуваат за нивното овогодинешно, трето учество.