- Студентите од четврта година на Правосудна насока симулираа главна расправа во редовна парнична постапка од областа на меѓународно трговско право. Станува збор за меѓународен трговски спор во рамките на предметот Меѓународни трговски договори. Сметаме дека преку овие симулации студентите ќе имаат можност да ги совладаат практичните аспекти на правото. Организацијата на овие судски процеси ќе им даде можност покрај теоријата да се запознаат со имплементација на законот и да ги совладаат постапките - изјави професорката на Правниот факултет, доц. д-р Борка Тушевска.

За студентите ова, исто така, е голема можност. Тие се задоволни од можноста да бидат дел од целата оваа практична настава и да се видат себеси во одредени улоги во судницата.

- Ова ми е трети пат да учествувам на симулирано судење. По трети пат ја имам улогата на судија. Оваа улога е доста тежок процес во постапката. Станува збор за доста комплексен случај и тука се застапени повеќе договори од трговското право. Симулираните судења нам студентите ни овозможува да видиме како изгледа реален судски процес со реални судски предмети - изјави студентот Иван Николов од Правниот факултет.

Симулирано судење се одржа во судницата на Правниот факултет при Универзитет „Гоце Делчев“, а голем број студенти не само што учествуваа во судењето туку и го следеа како публика.