Покрај кулинарската библиотеката, компјутерската лабораторија и амфитеатарот, Академијата располага со три ресторани и шест кулинарски лаборатории: чоколадна фабрика со 3D печатач за чоколада, винарија, топла и ладна кујна, опремени со најсовремена технологија. Професорите кои предаваат во Академијата се професионалци со големо искуство од Европа, Канада и од САД. Студентите кои се обучуваат на оваа Академија доаѓаат од најразлични земји во Европа, Африка, Блискиот Исток и САД.
При посетата, студентите од ФТБЛ имаа можност да готват заедно со нивните колеги и професори, а темата која беше разработена се однесуваше на молекуларната гастрономија во слаткарството, каде што се користеше течен азот во кулинарското производство. Исто така, тие го посетија ресторанот „Таленти“ и дегустираа современи јадења. Ресторанот е сопственост на Кулинарската академија, а во персоналот и во управувањето се вклучени студентите. Во ресторанот се поставени монитори преку кои клиентите можат да го следат приготвувањето на јадењата во кујната, а ентериерот во ресторанот е со фотографии и мотиви од студентите.
Посетата им даде можност на студентите од ФТБЛ да разменат контакти, мислења и да дискутираат на теми поврзани со гастрономијата со предавачи од Кулинарската академија. Студентите на оваа посета беа водени од проф. д-р Нако Ташков, доц. д-р Дејан Методијески и д-р Оливер Филипоски, кои, исто така, воспоставија контакти за идна соработка со Кулинарската академија, мобилност на наставничкиот кадар и студентите, изработка на заеднички проекти, размена на литература и останати активности.
