Приказ на предметите според таг: umetnost

Во Галеријата „Безистен“ во Штип на 29.11.2021 год., во 12 часот,  ќе биде отворена изложбата „Траги“ Ѓорѓи Чулаковски Ѓото, која е организирана од Ликовната академија при Универзитет „Гоце Делчев“ - Штип, Завод и Музеј - Штип и Верица Чулаковска, сопруга на уметникот.

Изложбата се состои од дваесетина графики и литографии од различни периоди на продукција и уметнички циклуси на Ѓорѓи Чулаковски Ѓото. Таа,  всушност, е омаж кон делото на Ѓото и е организирана на денот на неговиот роденден, по повод предавањето на донацијата на предметите од последното графичко ателје на уметникот, кои Чулаковска ги доделува на Ликовната академија. Авторката на изложбата, асс. м-р Екатерина Намичева-Тодоровска, и кураторот, д-р Катерина Деспот од УГД, во пригодниот каталог за изложбата ќе констатираат: „Веројатно амалгамот од  учителскиот занает и душата на уметникот создадоа еден вонземен имагинарен свет, за кој впрочем и Ѓото низ целото свое уметничко патешествие постојано трагаше. Токму отпечатокот од тој свет, и физичкиот и духовниот, ние денес имаме ексклузивна можност да го консумираме на изложбата, благодарение на несебичниот гест на  г-ѓа Верица Чулаковска, сопругата на Ѓото, со нејзиното решение да ја донира за студентите  на  Ликовната академија при УГД во Штип целокупната оставина од последното ателје на уметникот, во кое тој ги помина последните продукциски години од својот живот. Ателје кое претставуваше речиси алхемиска лабораторија за истражувачките походи на Ѓото во потрагата по вонземски пејзажи, чудесни предели, низ кои тој пловеше со својата уметничка фантазија инспириран од реалниот  поглед кон бескрајното синило на Охридското Езеро, но и од исконските траги кои ги корнеше од својот бит врзан со Егејскиот дел на Македонија од каде што потекнуваат неговите семејни  корени. Тивкиот и сталожен карактер на учителот Ѓото, неговата систематичност во анализите за своите дела, наспрема нескротливата творечка енергија и жар кои беа одлика на графичарот Ѓото, извираат како неизбришлив отпечаток од секое негово дело“.             

Донацијата содржи дел од најзначајните литографии, акватинти и серографии од сопствената збирка на г-ѓа Чулаковска, подарени на Ликовната академија, каде што ќе биде формирана мала постојана едукативна галерија во периодот пред нас. Останатиот дел од донацијата, кој се состои од комплетна графичка работилница со две графички преси, штафелаи, движен графички материјал, веќе почнува да го добива својот нов живот во одделното графичко ателје на Ликовната академија, во кое ќе можат студентите да ги практикуваат графичките техники кои ги изучуваат но и со идеја да биде продолжена учителската мисија која Ѓото ја започна пред повеќе од половина век.

Со надеж дека студентите на Ликовната академија ќе уживаат во изучувањето на графичкиот занает, следејќи ги трагите од умешноста на бардот на графичката уметност – Ѓорѓи Чулаковски Ѓото, Ликовната академија при УГД Штип со голема посветеност пристапи кон реализацијата и прифаќањето на донацијата на г-ѓа Чулаковска - мисија која на задоволство на сите веќе од идеја прерасна во реалност. Особено со голем пиетет кон донаторскиот гест, ректорот на УГД, проф. д-р Блажо Боев и деканката на Ликовната академија, проф. д-р Катерина Деспот, овозможија со донираната графичка опрема да биде збогатена едукативната програма на своите студенти и со тоа да им овозможат што поквалитетно практично образование.

На 17 ноември 2021 г. во 20 часот во Културно-информативниот центар во Скопје ќе биде отворена изложбата „Трансценденција“ од авторот Слободан Милошески. Изложбата е составена од 15 скулпторски дела од галериски формат, создадени со примена на техника на заварување на метал. Скопската публика изложбата ќе може да ја посети до 30 ноември.

Низ призмата на оваа изложба на скулпторот Слободан Милошески скопската публика има можност уште еднаш да види иновативна скулптура која се карактеризира со две особини: начинот на кој се користи материјалот (во овој случај станува збор за метал) и концептот на артикулирање идеи кои се од доменот на духовното.

Општопознато е дека металните скулптури се појавуваат во најстариот период на човечката цивилизација (статуетки, фигурини, тотеми) и тие имаат свој развој до монументалните споменици на современиот свет. Во сите овие фази металот има свои технологии на обработка – од целосно соголување на површината (поради елиминација на сите производи од корозија), преку користење на абразивни техники, како што се пескарење или минирање со микромонисти, па сѐ до хемиско соголување и електрохемиска редукција. Ваквите процедури, во својата завршница, произведуваат патина или полирана површина, секоја со свои специфичности и намени. Патините се ценети поради естетската убавина и му даваат автентичност на предметот. Поради тоа, класичните скулптури од историјата на уметност се обработени според оваа процедура.

Авторот Милошески е член на ДЛУМ од 2009 година, а во моментот работи како вонреден професор на Ликовната академија при Универзитет „Гоце Делчев“ во Штип.

Џез одделот на Музичката академија при Универзитет „Гоце Делчев“ – Штип преку настапот на професорот Сашо Поповски вторпат ќе биде дел од еден од најголемите европски настани посветен на џез индустријата.

Џез музичарот Федерико Пасучи одржа мастер клас пред студентите на Музичката академија при УГД. Тој е љубител на балканската музика, а на Универзитетот „Гоце Делчев“ е по покана на деканот Тони Китановски.

На 15 октомври 2021 г. во 19.30 часот во ликовниот салон на ДЛУБ во Битола ќе биде отворена изложбата „Интерактивни рефлексии“ од авторот Слободан Милошески. Изложбата е составена од скулпторски дела од галериски формат, создадени со примена на  техника на заварување на метал. Битолската публика изложбата ќе може да ја погледне до 22 октомври.