На Меѓународната конференција учествуваа стотина студенти од Хрватска, Словенија, Црна Гора, Србија, Босна и Херцеговина и од други земји. Едукативниот дел беше покриен со гости-предавачи и интересни теми од угостителството и туризмот поврзани со културата на однесување. Предавачите беа претставници од образовните институции, од приватниот и од јавниот сектор од областа на туризмот.

Во спортскиот дел, кој беше организиран во склоп на конференцијата, студентите од УГД учествуваа во натпреварите по футсал за мажи и одбојка за жени, каде што ги освоија третото и второто место и се закитија со пехари. За време на конференцијата за студентите беше организиран разглед на градот Шибеник со локален туристички водич, посета на Националниот парк „Крка“, а на враќањето кон Македонија студентите направија двочасовен разглед на најпознатата туристичка дестинација во Хрватска - Дубровник.

Конференцијата им даде можност на студентите да разменат контакти, мислења и да дискутираат на теми поврзани со туризмот со своите колеги и гости предавачи од различни земји. Студентите на оваа конференција беа водени од доц. д-р Дејан Методијески и м-р Оливер Филипоски кои, исто така, воспоставија контакти за идни соработки со факултети за туризам од Балканот.