Настанот започна со воведниот говор од страна на министерката за туризам на Република Грција, Елена Кундура, при што нагласи: „Важно е да се пренесе пораката дека туризмот е силна движечка сила за развој, кој притоа ги поддржува националната економија и вработувањето. Директно и индиректно претставува 20% од бруто-домашниот производ и речиси еден милион работни места. Ги поврзува и поддржува сите други продуктивни активности како примарно производство, трговија, извод, промоција на локални производи“.

Целта на Саемот за туризам беше истакнувањето на најновите случувања во меѓународната туристичка индустрија и збогатување на грчкиот туристички пазар. На саемот беа организирани и неколку паралелни настани какo: B2B работилници и Конференција за брендирање на туристички дестинации.

Меѓународниот саем за хотелиерство во оваа 2017 година беше насочен кон прикажување на современ и бизнис ориентиран производ. Главни сектори на кои саемот се насочи оваа година сe: дизајн и реновирање, приготвување и послужување храна, технологија и хигиена. Во склоп на организацијата, исто така, беа организирани и неколку настани, како настан за уметноста во пиење на кафе, настан за барменство и др.

Покрај саемот, студентите имаа можност да ја посетат и најстарата и најпозната термална бања во Грција, бањата Лутраки, чијашто температура на водата достигнува околу 37-38 Целзиусови степени и водопадите во Воден со височина од 70 метри.