Професорот Рокленд во Македонија престојува преку Фулбрајт програмата, преку која и професори и студенти од УГД и од Р.Македонија престојуваат во САД.
- Јас сум овде преку Фулбрајт програмата, преку која американските професори доаѓаат во Македонија. Поголемиот дел ќе бидам во Скопје, но среќен сум што денеска сум и во Штип. Со студентите ќе разговарам за популарната култура. Знаете, универзитетите многу често се фокусираат на онаа елитистичка култура, но јас навистина сакам да зборувам за популарната култура, која кажува каков е народот всушност. На факултетите често знаеме да кажеме и ги цитираме книгите како главен извор на знаење, а и се потенцира дека книгите се подобри од другите форми на уметноста, на крајот на краиштата ние професорите пишуваме книги и ги промовираме. Кога на мои пријатели во САД им кажав дека ќе одам во Македонија да предавам за популарната култура, ме прашаа зошто , што ќе кажам за американската популарна култура. Тој пријател кој ме праша зошто сакам да предавам за популарната култура,секогаш кажува дека книгата е подобра од филм, што е глупаво да се каже, бидејќи тоа се две различни форми на уметност, тоа е како да кажеш дека некоја слика е подобра од некоја симфонија на пример. Популарната култура денес се живее, и затоа сум тука, да ја раскажам таа приказна – изјави професор Рокленд.
Посетата на професорот од САД е дел од активностите кои ги има Филолошкиот факултет за да им овозможи на студентите да добијат светски искуства за повеќе области од животот преку директни контакти и средби со познати професори, изјави деканот на Филолошкиот факултет, доц.д-р Драгана Кузмановска:
- Ние како Филолошки факултет при УГД сме отворени за секаков вид на соработка, досега бевте сведоци на повеќе наши проекти и гостувања на различни професори, овој почесен професор ни е денес гостин преку Фулбрајт програмата, и тој ќе се обиде на еден интерактивен начин со нашите студенти англисти, а секако и со другите групи да ја претстави својата култура, односно да размени свои видувања и идеи со нашите студенти, што секако е добредојдено за нив за зголемување на нивниот вокабулар, лексика, а секако и за запознавање со една ваква личност.
