Студенти од УГД на „ЕУ појадок“

- Мај 13, 2016

Поврзани вести

Студенти од Правниот факултет при Универзитет „Гоце Делчев“- Штип присуствуваа на „ЕУ појадок“, кој по повод денот на Европа на 10 мај се одржа во Клуб на пратеници во Скопје. Во склоп на настанот на студентите им беа доделени сертификати за учество во четвртата по ред дебата од дебатниот циклус „ЕУ ѕвезди“, организиран од Секретаријатот за европски прашања. Студентите од Правен факултет на дебатата одржана на 20 април дебатираа на тема „Образовни политики: квалитет наспроти квантитет“ изнесувајќи ја од една страна потребата од квалитетно високо образование, а од друга страна потребата од еднаква можност за сите да го остварат своето право на високо образование.

На ЕУ појадокот студентите имаа можност да се запознаат со студенти од ФОН Универзитетот, Државниот универзитет во Тетово, Универзитетот на Југоисточна Европа, како и со студентите од Меѓународниот балкански универзитет, кои исто така учествуваа во дебатниот циклус.

Домаќин на настанот беше заменик-претседателот на Владата задолжен за европски прашања, Арбер Адеми, кој заедно со шефот на Делегацијата на Европската унија, Аиво Орав, им ги додели сертификатите на сите студенти кои учествуваа во дебатите. Присутни на ЕУ појадокот беа и амбасадорите на земјите-членки на ЕУ и поранешните вицепремиери за европски прашања. Свое излагање имаше и координаторот на проектот „ЕУ ѕвезди“, Флорида Реџепи, која најави продолжување на дебатниот циклус преку меѓусебно соочување на ставови на студентите од различни универзитети.