По покана на Microsoft Macedonia, Одделот за електронски индекс при Универзитетот имаше свое предавање на тема „E-index as a basis for e-university“. Предавањето се реализираше од страна на м-р Илија Лазаревски, софтверски инженер за анализа и дизајн и м-р Ристе Тимовски, раководител на Одделот за електронски индекс при Универзитетот.
Во предвидениот термин беше направена ретроспектива на историјатот на ИКТ развојот на Универзитетот, како и повеќегодишниот макотрпен процес да се инсталира систем кој е навистина редок на овие простори и пошироко, кој нуди комплетна електронска (само)администрација на сите потребни активности на студентите на Универзитетот:
- администрација на податоци;
- упис на семестар;
- заверка на семестар;
- пријавување на испити;
- пријавување на проектни задачи;
- поднесување на барања;
- огласна табла;
- електронски консултации;
- целосна електронска постапка за завршен испит / дипломски труд;
- целосно електронско плаќање на услугите и
- други електронски активности.
Беа предочени сите бенефити од имплементацијата на овој систем, чие постојано надоградување и развој продолжува континуирано од страна на целокупниот тим на одделот за електронски индекс, кој во корелација со ИТ центарот и сите други структури неуморно работи во оваа насока. Секако, уште еднаш беше потенцирана и отвореноста на УГД за целосна соработка со сите државни соодветни институции и други Универзитети, во насока на размена на податоци и прогресивен национален интеркомуникациски развој.
