- Издавачката куќа „Просветно дело“ заедно со Факултетот за образовни науки при УГД направи заеднички проект и го издадовме овој прирачник. Ова издание претставува соединување на теоријата и праксата - изјави Ксенија Трајчева, одговорен уредник во Детската редакција на „Просветно дело“.
Прирачникот е дело на професорката Снежана Мирасчиева од Универзитет „Гоце Делчев“ во Штип и на педагогот Елизабета Симоновска од Детската градинка „Астибо“ во Штип.
- Овој прирачник настана како резултат на долгогодишната соработка меѓу ФОН и детсктите градинки, во овој случај Детската градинка „Астибо“ во Штип. Направивме спој меѓу теоријата и практиката со цел да се спротивставиме на заборавот и нашите традиционални игри да ги ставиме во функција на воспитување на младата детска личност - изјави проф. д-р Снежана Мирасчиева, една од авторките на прирачникот.
Авторките велат дека овој прирачник ќе биде наменет за сите наставници и воспитувачи во предучилишна возраст.
- Прирачникот содржи игри кои се наменети за правилен раст и развој на дечињата. Има игри за развојот на телото со подвижни игри, но и за развојот на говорот и збогатување на нивниот вокабулар - изјави авторката Елизабета Симоновска.
Промоторката на прирачникот изјави дека ова дело има огромна едукативна вредност и дека ова ќе биде значајно за сегашните, но и за идните генерации.
- Ова ни овозможува да ја зачуваме традиционалната игра и да се исклучиме од дигиталниот свет и децата да се препуштат на детското во нив. Се надевам дека со оваа книга децата ќе ги играат игрите што ги играле нашите предци - изјави проф. д-р Снежана Јованова-Митковска од Факултетот за образовни науки.
Прирачникот денес предизвика огромен интерес кај наставниците во детските градинки во Штип.
