На настанот присуствуваше и ректорот на УГД, проф. д-р Блажо Боев, а покрај другите се обрати и министерката за образование и наука на РМ, Рената Дескоска, и заменик-амбасадорката на САД, Михаела Шварцер Блум. Министерката Дескоска го искористи настанот и на ректорите им го достави новиот Предлог-закон за високо образование.
„Корупцијата во универзитетите ја поткопува довербата во образовниот систем. Како резултат на тоа, студентите, кои стануваат сè поразочарани, се одлучуваат да ја напуштат земјата. На Македонија ѝ требаат тие студенти, кои се паметни и амбициозни, да останат тука и да го дадат својот придонес“, истакна Блум.
„Во Предлог-законот за високо образование се предвидени повеќе механизми за борба против корупцијата, како што се: транспарентност на носење одлуки во универзитетите, деконцентрација на моќта, учество на студентите во одлучувањето, механизми за департизирање на одредени постапки кои се спроведуваат. Предвидено е да се избере овластено лице за прием на пријави на корупција кај кое пријавувањето ќе биде анонимно. Тоа лице ќе биде избирано од Сенатот за период од две години и ќе го информира Сенатот за својата работа“, образложи министерката Дескоска.
Настанот беше организиран од Институтот за стратешки истражувања и едукација – ИСИЕ, со поддршка на Амбасадата на САД во РМ.
Декларација за „Универзитет без корупција“
Тргнувајќи од уставно загарантираната автономија на универзитетот, посветени на приближувањето кон европскиот образовен простор, положбата, правата и достоинството на студентите, унапредувањето на наставниот процес и истражувањата, како и положбата и дигнитетот на наставничкиот кадар, со потпишувањето на оваа Декларација ги реафирмираме сите досега преземени чекори и уште еднаш ја изразуваме нашата посветеност во изградбата на универзитет без корупција. Имајќи предвид дека студентите преку образованието го формираат етичкиот и моралниот светоглед на идните професионалци, со што директно влијаат на насоката во која ќе се развива општеството, свечено го изјавуваме следново:
- Универзитетот во 21 век подразбира академска средина во којашто се цени знаењето на студентите, кое се потврдува единствено врз основа на нивниот вложен труд, посветеност кон науката и трудољубивост. Уште еднаш потврдуваме дека во академската заедница немало и нема да има место за пристрасност и субјективност.
- Наставничкиот кадар независно од својата професионална дисциплина посветено ги промовира етичките стандарди во научноистражувачката работа за време на извршувањето на своите наставни обврски.
- Универзитетите ќе се залагаат за начелата и принципите на законитост, чесност, трудољубивост, стручност и компетентност во работата со студентите и со пошироката заедница. Од тие причини, посветени сме на преземање на дејствија, активности и иницијативи за надминување на предизвиците во високото образование, особено:
– Поттикнување на слободното знаење, како и креативната и критичка мисла на студентите и промоција на политика на отворени врати, преку обезбедување на најдобри можни услови за студирање.
– Унапредување на меѓуфакултетската и меѓууниверзитетската соработка, особено во контекст на вклучување на содржини во наставните програми со кои се поттикнува етичкото однесување и се објаснуваат механизмите на борбата против корупцијата, во согласност со универзитетските акти.
– Имплементирање на најдобрите меѓународни практики и стандарди во борбата против корупција во високото образование во етичките кодекси и интерните акти на универзитетите.
– Усогласување со обврските кои произлегуваат од Законот за заштита на укажувачите.
– Информирање и промоција на соработката со студентите, студентските организации, студентските правобранители и воспоставување на континуиран дијалог помеѓу студентите и органите на управување на факултетите и универзитетите од аспект на ова актуелно прашање.
Скопје, 18 декември 2017 година
За Универзитетот „Св. Кирил и Методиј” во Скопје, ректор, проф. д-р Никола Јанкуловски
За Универзитетот „Св. Климент Охридски” во Битола, ректор, проф. д-р Сашо Коруновски
За Универзитетот „Гоце Делчев” во Штип ректор, проф. д-р Блажо Боев
За Универзитет на Југоисточна Европа, ректор, проф. д-р Замир Дика
За Универзитет за информатички науки и технологии „Св. Апостол Павле“ во Охрид, ректор, проф. д-р Нинослав Марина
За Универзитет „Мајка Тереза” во Скопје, ректор, проф. д-р Азис Положани
За Универзитетот во Тетово, проректор, проф. д-р Хазир Положани
М.В