Во првиот ден од посетата студентите имаа можност да се запознаат со основните податоци за компанијата „Кончар“, како и да го проследат процесот на производство на генератори и мотори. Потоа студентите беа во посета на нивниот Институт за електротехника, како и погоните за индустриска електроника и информатика (ИНЕМ).
Во вториот ден од посетата студентите се запознаа со производството на сите видови трансформатори, мерни, енергетски, дистрибутивни и специјални како и со погoните за производство и ремонт на електрични возила – производство и одржување на електрични локомотиви, трамваи и возови. За студентите на Електротехнички факултет посетата е од извонредно значење:
- Посетата на фабриката „Кончар“ во Загреб беше големо искуство за сите нас. Беспрекорната организација и гостопримливоста на домаќините ги надминаа нашите очекувања. Бевме воодушевени од нивната работа, односно од целиот редослед на постапки за добивање на готов производ, како што се проектирањето, изработката, монтирањето и инсталацијата. Се запознавме со диспечерскиот центар преку кој ја контролираат ветерната централа, ја посетивме фабриката за генератори и мотори, како и за трансформатори. Имавме можност да ги видиме светски признатите лаборатории и да се запознаеме со нивниот стручен кадар. Оваа посета ни овозможи одблизу и во реални услови да ги видиме работите што до сега сме ги гледале само на лист хартија – изјави Ивона Петровиќ, студентка во трета година.
- Патувањето во Хрватска и посетата на фабриките на компанијата „Кончар“ беше од големо значење за нас студентите од Електротехнички факултет при Универзитет „Гоце Делчев“ – Штип. Таму се запознавме со работата на погоните на „Кончар“, а исто така се запознавме и со целиот производствен асортиман на оваа реномирана европска компанија. Низ секој погон имавме претставник кој ни го опишуваше во целост производството во погонот и ни одговараше на сите наши прашања. Престојот беше едно големо искуство за нас студентите, а исто така и за професорите и асистентите. Се надаваме дека оваа соработка помеѓу нашиот факултет и компанијата „Кончар“, како и пријателските односи меѓу студентите од Македонија и од Хрватска ќе продолжи и во наредните години и ќе се претвори во убава и корисна традиција – вели Борче Алексов, студент во трета година на ЕТФ – Радовиш.
