Проректорот за настава на УГД доц. д-р Кирил Барбареев истакна дека Универзитетот „Гоце Делчев“ со денешниот настан му го дава заслуженото значење и внимание на Денот на Европа:
- Човек денес е и горд, но може да се каже и тажен, поради тоа што Македонија која можеби е извор на најчистата форма на идејата за Европа која е стара повеќе од три илјади години и која имала најразлични манифестации за нејзина реализација, а која во последните седумдесет години всушност се реализира, заради тоа што веројатно свеста тогаш пораснала, всушност претставува најчистата форма на идејата на Европа, а во најсилна концентрација е зачувана мултикултуралноста, мултирелигиозноста и мултиетничноста. Заради тоа, мислам дека ние како граѓани сме, всушност, и горди заради идејата, но и реализацијата која се реализирала, а ние сѐ уште не сме членки на една заедница за која целокупниот извор потекнува одовде. Универзитетот дава поддршка на одбележувањето на Денот на Европа, ќе бидат присутни студентите и професорите и ќе разговараме за значењето и вредноста на Европа.
Според проф. д-р Страшко Стојановски, промоцијата на изданијата кои ги подготвува Центарот за правно-политички истражувања е од извонредно значење за Центарот и за Универзитетот:
- Ова е прв настан од ваков тип кој го организира Центарот. Знаете дека досега организиравме истражувања, трибини, дебати, но првпат правиме сублимат на нашите активности кои беа интензивни во последните три години. Се работи за три изданија, во кои покрај професори се вклучени и студенти кои се производ на Правниот факултет, а тука се и зборниците од двете научни конференции што ги организиравме. Овој сегмент на издавање е еден од белезите на секој универзитет. Издавачката дејност е сфера во која ние сакаме да делуваме и да даваме придонес кон пошироката, пред сѐ академска средина, но се разбира и во пошироката средина на граѓанството кое би ги консултирало овие дела, исто така би се создале услови за дебата, би се развила таа дебата и ова би бил еден од основните столбови на работата на Универзитетот севкупно.
