Директорот на Институтот, проф. д-р Драгомир Волчев, и вработените ги запознаа студентите со работата на Институтот, а потоа и со лабораториите и опитните површини каде што ги реализираат научната и апликативната работа.

Студентите имаа можност и практично да ги прошират своите знаења и вештини за техниките на хибридизација кај јачмен и овес, почнувајќи од подготвување на родителските растенија, кастрирање, опрашување и нивно одгледување до зрелост.

Исто така, на студентите им беше презентирана техника на селекција за отпорност кај јачмен. Тие ги посетија површините каде што е организирано биолошко и биодинамично производство, при што можеа да видат и селекциски материјал за биолошка селекција на јачмен. Во рамките на посетата беа организирани и посети на успешни приватни компании од областа на земјоделството.

Посетата во целост беше одлично организирана од нашите исклучително љубезни домаќини, со исклучителна отвореност за соработка. На нивно задоволство, студентите покажаа голем интерес за сѐ што можеа да видат и слушнат.