Во почетокот на 19 век се појавуваат првите карти на оваа планета, а истражувањата кои се направиле во средината на 19 век покажале дека на Марс денот трае приближно исто колку и на нашата планета, но дека сепак годишните времиња се двојно подолги.
Во 20 век, кога започнуваат интензивните и понапредни истражувања на Марс, е значајна 1964 година, кога за првпат успешно е лансирана ракетата Маринер 4 - првата ракета што го прелета Марс и на Земјата испрати 21 фотографија од друга планета.
По овој успех, НАСА ги лансираше Маринер 6 и Маринер 7 кои испратија десетици фотографии на кои се гледаа големи кратери, па извесен период се сметало дека Марс изгледа како Месечината.
Освен НАСА, и Советскиот Сојуз вршеше интензивни истражувања на Марс, а најголемиот успех го постигнаа со ракетата Марс 3.
Во 1975 година НАСА ја лансираше Викинг 1, а неколку месеци подоцна и Викинг 2, која на Земјата испрати 16.000 фотографии и се смета за еден од најуспешните експерименти на НАСА.
Во периодот од 1996 година до 2001 година се истакнуваат проектите на НАСА: Mars Global Surveyor - кој испрати повеќе фотографии од сите дотогашни мисии и 2001 Mars Odyssey - кој за првпат испрати фотографии со високи резолуции.
Од 2001 година до денес НАСА реализираше повеќе успешни лансирања, а секако најзначајно откритие е што научниците го потврдија постоењето на вода на Марс.
